Me një program të pasur kulturo-artistik, ALG “Loyola-Gymnasium” sot ka festuar 18-vjetorin e themelimit, me një aktivitet të larmishëm, i njohur si Dita e Dyerve të Hapura.
Në fillim, të pranishmëve u kanë uruar mirëseardhje u.d. drejtoresha ekzekutive e ALG “Loyola-Gymnasium”, M. Lindita Spaqi, drejtori i “Loyola-Gymnasium”, z. Enver Sulaj dhe kryetari i Bordit të ALG-së, dr. z. Mattias Czech, ndërsa fjalë rasti kanë mbajtur Ambasadori i Gjermanisë në Kosovë, z. Jorn Rohde, drejtoresha e DKA-së në Prizren, Luljeta Veselaj-Gutaj dhe vikari gjeneral i Ipeshkvisë së Kosovës, don Shan Zefi.
Programi qendror është shfaqur para të pranishmëve të shumtë në amfiteatrin e shkollës, ku përveç të ftuarve dhe mysafirëve të shumtë nga Kosova, kishte edhe të ftuar, mbështetës të ALG-së dhe nxënës e kolegë mësimdhënës nga Gjermania.
Dita e Dyerve të Hapura ka vijuar nëpër të gjitha hapësirat tjera të kampusit të “Loyola-Gymnasium”, ku janë janë zhvilluar aktivitete sportive, janë hapur ekspozita me punime në pikturë e punime artizanale, janë shfaqur materiale filmike nga veprimtaritë në shkollë, eksperimente në laboratore etj.