Në Gjykatën Themelore në Prizren, të hënën, për shkak mungesës së të akuzuarve Safet Hyseni dhe Blerim Hyseni, ka dështuar të mbahet shqyrtimi fillestar për tentim vrasjen e vitit 2009.
Në këtë rast, Safet Hyseni dhe Behxhet Hysenin po akuzohen se kanë kryer veprën penale “Vrasje në tentativë”, ndërsa i akuzuari Blerim Hyseni ngarkohet për veprën penale “Lëndimi i lehtë trupor”, raporton “Betimi për Drejtësi“.
Lidhur me mungesën e dy të akuzuarve, kryetarja e trupit gjykues, gjykatësja Teuta Krusha, tha se nga fletëkthesa konstatohet se i akuzuari Safet Hyseni gjendet jashtë shtetit, ndërsa për të akuzuarin Blerim Hyseni tha se nuk ka prova që i njëjti është ftuar në mënyrë të rregullt.
Mungesa e kushteve ligjore, ka bërë që kjo seancë të shtyhet, kurse e radhës është caktuar të mbahet më 19 korrik 2023.
Asociation “Loyola–Gymnasium” shpall konkurs për regjistrimin e nxënësve të rinj
Ndryshe, në Gjykatën e Qarkut në Mitrovicë më 18 janar 2010, ndaj tre të akuzuarve Hyseni, Prokuroria e Qarkut në Mitrovicë kishte ngritur aktakuzën për veprat penale “Vrasje në tentativë dhe “Lëndimi i lehtë trupor”.
Pas 8 vitesh nga ngritja e aktakuzës, Gjykata Themelore në Mitrovicë, Departamenti për Krime të Rënda, me gjykatës Burim Ademin kishte caktuar shqyrtimin fillestar më 1 shkurt 2018, mirëpo për shkak mungesës së të akuzuarve Safet Hyseni dhe Blerim Hyseni, kjo seancë fillestare kishte dështuar të mbahet.
Kjo çështje penale, me vendimin e Këshillit Gjyqësor të Kosovës të 19 nëntorit 2022, është transferuar nga Gjykata Themelore në Mitrovicë në Gjykatën Themelore në Prizren. Përveç rastit të të akuzarve Hyseni, kjo gjykatë ka pranuar edhe 8 raste të tjera të natyrës penale në Departamentin e Krimeve të Rënda.
Ndryshe, në aktakuzën e Prokurorisë së Qarkut në Mitrovicë, të ngritur me 18 janar 2010, thuhet se më 25 nëntor 2009, në fshatin Runik, Komuna e Skenderajt, sipas marrëveshjes paraprake në mes të të pandehurve Behxhet dhe Safet Hyseni, me dashje kanë tentuar që ta privojnë nga jeta të dëmtuarin Blerim Hyseni.
Sipas aktit akuzues, të akuzuarit Hyseni, në fshatin Runik kanës hkuar me veturën e Afrim Hysenit, ku i dëmtuari Hyseni ka hyrë në veturë, i pandehuri Safet ka tentuar që ta godasë të njëjtin, i cili ka qenë i ulur në karrigen e prapme afër të pandehurit Behxhet Hyseni dhe kur ndërhynë Afrim Hyseni ata dalin nga vetura dhe ata fillojnë që të rrahen dhe Safet Hyseni e rrëzon për tokë të dëmtuarin Blerim, duke e goditur nëpër pjesë të ndryshme të trupit.
Tutje, në atakuzë thuhet se i pandehuri Behxhet Hyseni nga mbrapa shpinës, të dëmtuarin me thikë e godet nën sqetull të anës së djathtë duke i shkaktuar lëndime plagë prerëse.
Për këtë, të akuzuarit Behxhet dhe Safet Hyseni po akuzohen se në bashkëkryerje kanë kryer veprën penale “Vrasje në tentativë” nga neni 146 lidhur me nenin 20 dhe 23, të Kodit të Përkohshëm Penal të Kosovës.
Ndërsa, sipas dispozitivit të dytë të kësaj aktakuze, i pandehuri Blerim Hyseni po akuzohet se më 25 nëntor 2009, në fshatin Runik, me një mjet të metaltë, i ka shkaktuar lëndime të lehta trupore të pandehurit – të dëmtuarit Safet Hyseni në kokë.
Për këto veprime, po akuzohet se ka kryer veprën penale “Lëndimi lehtë trupor” nga neni 153, pika 1. dhe 4, të Kodit të Përkohshëm Penal të Kosovës./BetimipërDrejtësi