Policia në Gjakovë ka publikuar disa fotografi të dy personave të dyshuar për vjedhje të rënda në fshatin Turjakë në Malishevë, me ç’rast ka kërkuar bashkëpunimin e qytetarëve për identifikimin e të dyshuarve.
Me autorizimin e Prokurorisë Themelore në Gjakovë për publikimin e fotografive të personave të dyshuar, policia ka lëshuar kërkesë për bashkëpunim me qytetarët me qëllim lokalizimin e të dyshuarve.
“Lidhur me disa raste të vjedhjeve të rënda të ndodhura në fshatin Turjakë në Malishevë, nga Stacioni Policor në Malishevë, janë duke u zhvilluar hetime intensive, ku gjatë veprimeve hetimore janë siguruar fotografi (nga kamerat e sigurisë) të personave që dyshohen se janë kryes të këtyre vjedhjeve. Në lidhje me rastin deri më tani nuk është arritur të bëhet identifikimi i identitetit të të dyshuarve, edhe përkundër angazhimeve të shumta hetimore dhe operative nga ana e Njësisë së Hetimeve në kuadër të Stacioni Policor në Malishevë, dhe njësiteve tjera në kuadër të Drejtorisë Rajonale të Policisë në Gjakovë”, thuhet në njoftimin e policisë.
Autoritetet kanë kërkuar nga qytetarët që kushdo që ka informacion për identitetin dhe vendndodhjen eventuale të të dyshuarve, të lajmërojnë stacionin më të afërt policor.
