Aleanca për Ardhmërinë e Kosovës ka mbajtur konferencë për media, ku ka shprehur pakënaqësitë për miratimin e Projektligjit për skemat pensionale të financuara nga shteti dhe mosvotimin e disa amandamenteve të propozuara nga ky grup parlamentar.
Sipas tyre vendimi i Kushtetueses nuk është respektuar dhe diskriminimi i personave që janë larguar dhunshëm nga puna do të vazhdojë për shkak se këta persona nuk kanë dëshmi për formën e largimit nga puna.
Sipas AAK-së deputetët e mazhorancës qëllimshëm nuk i kanë votuar amandamentet që heqin sipas tyre këtë formë diskriminimi.
“Paragrafi 2.2 i nenit 8 për pensionin parcial kontributdhënës nuk është votuar, arsyeja është se shumica që janë larguar prej punës nuk kanë dëshmi që janë larguar dhunshëm”, tha Shemsedin Dreshaj, deputet i AAK-së.
Ky subjekt politik po ashtu e kritikoi qeverinë e vendit që nuk po sjellë njohje për vendin dhe po e humb kredibilitetin në arenën ndërkombëtare.