Enver Sulaj
Varret janë shtrirë në fushën e gjerë
Ngado t’i shohësh të del harta e gjelbër e atdheut.
Qirinjtë varg ndriçojnë rrugicat e përgjakura
Shiu s’e shuan zjarrminë e stinës.
Nënat puthin gurët e varreve
Nga minaretë kumbon lutja për shpirtrat që panë antinjeriun.
Në flakë po t’i hedhësh mushkëritë
Frymë do të marrësh nga prushi
Nga dheu
Që i mbrami të bie mbi fytyrë.
Zot,
bëje dhembjen shpresë
Trishtimin – dashuri
Lotin – njomështi!
Në Srebrenicë sot bie shi.
Maj, 2024