Ministri i FSK-së, Agim Çeku, ka thënë se është e padrejtë të fajësohet për mosangazhim komisioni qeveritar për verifikimin e veteranëve të UÇK-së.
“Është e padrejtë që fajësohet vetëm komisioni në drejtim. Çuditem se si fajësohet komisioni, sidomos nga anëtarët e vet. Ju e dini se ky komision ka qenë i formuar që dy vjet, por ka filluar të punojë kur e kam marr ta udhëheq. Edhe ky fakt nuk duhet harruar”, ka thënë Çeku në një intervistë për “Epokën e re”.
Ai ka deklaruar se mungesa e ligjit për kategoritë e dala nga lufta është duke e prolonguar këtë proces. Çeku ka thënë se me miratimin e këtij ligji do të përshpejtohet procesi i verifikimit të veteranëve. Në këtë kontekst, Çeku ka thënë se Qeveria e Kosovës nuk ka kurrfarë agjende politike me veteranët. “Nuk duhet të ketë askush dyshime se ka mungesë vullneti, se ka mungesë angazhimi apo ka agjendë politike. Asnjëra prej tyre nuk qëndron”, është shprehur Çeku.
Ai është zotuar se çështja e veteranëve të UÇK-së do të zgjidhet në mandatin e Qeverisë së drejtuar nga Hashim Thaçi. “Jam i sigurt se kjo punë do të zgjidhet shpejt dhe në këtë mandat. Kjo nuk është punë vullneti, por çështje edhe e rrethanave objektive”, ka deklaruar Çeku.