Sot, u mbajt konferenca lansuese e projektit “Ngritja e kompetencave profesionale përmes zhvillimit profesional në fushën e menaxhimit, vlerësimeve, mendimit kritik dhe gjithë përfshirjes”.
Ky projekt financohet nga Komuna e Prizrenit dhe implementohet nga Qendra për Avancimin e Performancës së Arsimit, me qëllim të avancimit të cilësisë së arsimit në këtë komunë.
Në këtë ngjarje morën pjesë nënkryetari i Komunës, Kujtim Gashi, dhe drejtoresha e Drejtorisë për Arsimin (DKA), Luljeta Veselaj-Gutaj. Të dy përfaqësuesit theksuan rëndësinë e këtij projekti për zhvillimin e arsimit dhe përshpejtimin e cilësisë në institucionet arsimore.
“Ky projekt është një hap i rëndësishëm drejt përmirësimit të sistemit arsimor në Prizren”, tha Gashi.
“Objektivi ynë kryesor është skanimi i gjendjes aktuale në arsimin e Prizrenit dhe ngritja e performancës së personelit menaxhues dhe arsimor përmes trajnimeve dhe zhvillimit profesional”.
Marketing
Përjetoni pushime të paharruar dhe dasma magjike në Hotel “Albes Residence”
Po ashtu, Veselaj-Gutaj theksoi se “hartimi i një Strategjie 5-vjeçare për Arsimin Parauniversitar do të jetë një bazë e fortë për të garantuar një arsimim më cilësor për të rinjtë tanë.”
Ky projekt synon të ndihmojë në krijimin e një ambienti arsimor më të mirë, duke u fokusuar në zhvillimin e kapaciteteve profesionale dhe promovimin e gjithë përfshirjes në arsim. Me iniciativat e tilla, Komuna e Prizrenit dëshiron të sigurojë që të gjithë nxënësit të kenë mundësi të barabarta për të arritur suksesin akademik dhe profesional.
