Kryetari i Komunës së Prizrenit, Shaqir Totaj, priti sot përfaqësuesit e klubit futbollistik “Drini i Bardhë” nga Hasi, i cili në sezonin 2024/2025 u shpall kampion i Ligës së Tretë dhe siguroi ngjitjen në Ligën e Dytë për sezonin 2025/2026, raporton PrizrenPress.
“Me këtë rast urova përzemërsisht drejtuesit dhe lojtarët e klubit, meqë kjo arritje është fryt i përkushtimit, punës së palodhshme dhe dashurisë për sportin. Mbesim të përkushtuar që mbështetja institucionale për klubin dhe sportin në përgjithësi të mos mungojë as në të ardhmen,” u shpreh Totaj.
Kjo ngjitje shënon një arritje historike për “Drinin e Bardhë”, duke qenë hera e parë që klubi siguron ngjitjen në Ligën e Dytë, një sukses i madh për sportin dhe komunitetin e Hasit. Ky rezultat reflekton pasionin, disiplinën dhe përkushtimin e të gjithë atyre që kontribuan për këtë fitore.
