Avancimi akademik i Ibrahim Gashit është mbështetur në një raport që përmban kontradikta.
Në të diku i janë prezantuar rektorit tri punime shkencore, diku tjetër katër e diku pesë. Tri punimeve të publikuara në Indi u precizohet emri i revistës, e dy të tjerave jo. Raporti thotë se Gashi “është studenti më i dalluar” dhe “pionier në fushën e studimeve të historisë bashkëkohore”.
Dokumenti ishte hartuar nga Selim Daci. Në të formalisht kishin vënë firmat Gazmend Rizaj e Karl Kaser. Rizaj thotë ta ketë bërë këtë gjest me inerci, shkruan Koha Ditore.
Për ta merituar gradën profesor i rregullt duhet publikuar minimum pesë punime shkencore në revistat me recension ndërkombëtar, e Gashi nuk e kishte publikuar asnjë.
Komisioni ishte treanëtarësh, por vetëm njëri e kishte hartuar.
Të gjithë kontributin në të e kishte dhënë profesori Selim Daci, i cili ishte edhe kryetar i komisionit.
Dy vetë tjerë, Gazmend Rizaj dhe Karl Kaser, vetëm kishin vënë nënshkrimet sa për formalitet.
Rizaj thotë ta ketë dhënë nënshkrimin me inverci, Kaser nuk ka dashur të deklarohet derisa Daci prej kohësh ka thënë se qëndron pas gjithë përmbajtjes së dokumentit.