Gjykata Themelore në Prizren ka caktuar masën e paraburgimit ndaj katër të arrestuarve në rastin e dyshimeve për detyrim, armëmbajtje pa leje dhe shmangie tatimi.
Ndër të arrestuarit është edhe ish-drejtori i Policisë në Prizren, Nexhmi Krasniqi, aktualisht zyrtar policor. Kjo masë u mor për të siguruar rrjedhën e papenguar të hetimeve dhe për të parandaluar presionin mbi dëshmitarët apo manipulimin e provave.
Liman Sallauka, Xhevat Sallauka, Nexhmi Krasniqi dhe Ramadan Paçarizi dyshohen për tri vepra penale.
Sipas Prokurorisë, ata kanë detyruar me kanosje një person, të dëmtuarin E.M., të heqë dorë nga një pronë me vlerë të madhe, në favor të Ramadan Paçarizit, i cili e ka blerë pronën për një shumë më të ulët se çmimi i tregut, raporton “Betimi për Drejtësi”.
Gjithashtu, Ramadan Paçarizi dyshohet për shmangie tatimi, pasi nuk ka deklaruar vlerën reale të pronës dhe i ka dhënë blerësit 130 mijë euro para kesh, duke fshehur shumën e plotë të transaksionit. Liman Sallauka dyshohet edhe për armëmbajtje pa leje, pasi në shtëpinë e tij janë gjetur armë dhe municione, ndërsa në shtëpinë e Nexhmi Krasniqit janë gjetur 63 fishekë. Një pushkë ajrore pa leje është sekuestruar edhe në shtëpinë e Paçarizit.
Prokuroria argumenton se paraburgimi është i domosdoshëm për të parandaluar rrezikun që të dyshuarit të ushtrojnë presion mbi dëshmitarë, të prishin prova apo të përsërisin veprat penale.
“Betimi për Drejtësi” gjatë ditës ka raportuar mbi përmbajtjen e dosje së prokurorisë për caktim të masës së paraburgimit ndaj katër të dyshuarve përfshirë këtu edhe Krasniqin i cili kishte shërbyer si drejtor i Policisë në Prizrenit.
Ndryshe në njoftimin e Prokurorisë thuhet se gjatë kontrollit u sekuestruan përveç armëve edhe telefona mobil e elektroshok../BetimipërDrejtësi
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
Marketing
Banesat më të kërkuara në Prizren – Bëhu pronar në Foleja Residence!
Freski e përditshme me çmim të zbritur – zgjidh aparatet e ujit Bruno!
‘Toni Residence’ – Mos e humb rastin për të blerë banesën tënde në Prizren
Hapësira me qira në objektet e reja te ‘RENELUAL TAHIRI’ në Prizren
