Liberalizimi i vizave vazhdon të jetë çështje e ndjeshme për qytetarët e Kosovës, të vetmit në rajon që ende nuk e gëzojnë lirinë e udhëtimeve në vendet e zonës Schengen.
Ndonëse ka pasur premtime të mëdha nga Qeveria se së shpejti do të arrihet liberalizimi i vizave, Bashkimi Evropian ka tërhequr vërejtjen se ky do të jetë një proces i vështirë e i gjatë, si dhe nuk mund të parashikohet se kur do të mund të përmbyllet.
Të vërtetën për vizat para pak javësh e tha raportuesja për Kosovën në Parlamentin Evropian, Ulrike Lunacek.
Të njëjtën kohë edhe Komisioni Evropian e bëri të qartë se Kosova duhet të dëshmojë se nuk ka rrezik për migrim ilegal apo të sigurisë për vendet anëtare të BE-së para se Komisioni mund t’ia rekomandojë Këshillit dhe Parlamentit Evropian heqjen e vizave për qytetarët e Kosovës. /Koha Ditore/