Kryetari i Këshillit Kombëtar të NISMA për Kosovën, Jakup Krasniqi, ka shprehur gatishmërinë të jap dorëheqje nga posti i Kryetarit të Kuvendit të Kosovës, pasi kjo pozitë i takon subjektit më të madh politik në vend, PDK-së.
“Pas themelit të subjektit politik NISMA për Kosovën, Kryesia e saj në mbledhjen e mbajtur sot, shqyrtoj pozitën e kryetarit të Kuvendit të Kosovës Jakup Krasniqi. Kryetari i Këshillit Kombëtar të NISMA për Kosovën, Jakup Krasnqi në mbledhjen e parë të Kryesisë pas themelimit të saj u deklarua se është i gatshëm të jap dorëheqje nga posti i kryetarit të Kuvendit të Kosovës”, është thënë në komunikatën e këtij subjekti politik.
Kryesia e NISMA për Kosovën pas diskutimeve erdhi në përfundim se dorëheqja e Kryetarit të Kuvendit në situatën në të cilën gjendet vendi, sidomos tash pasi kemi hyr në vitin zgjedhor nuk do t’i kontribuonte stabilitetit institucional dhe politik në Kosovë.
“Kryesia është e vetëdijshme që posti i kryetarit të Kuvendit sipas Kushtetutës së Republikës së Kosovës i takon partisë që ka dal forca e parë politike, në këtë rast PDK-së, prandaj Kryetari i Këshillit Kombëtar të NISMA për Kosovën dhe Kryesia e saj janë plotësisht dakord që në rast se PDK parashtron një kërkesë të tillë zyrtare, kryetari i Kuvendit të Kosovës z. Jakup Krasniqi është i gatshëm të dorëhiqet nga posti i kryetarit të Kuvendit”, është thënë në komunikatën e NISMA për Kosovën.