Menaxhmenti i Universitetit të Prizrenit “Ukshin Hoti”, ka demantuar akuzat që Parlamenti Studentor ka bërë për ‘bllokimin e zgjedhjes së dekanit të Fakultetit Juridik’.
“Në Fakultetin Juridik kishim dy kandidatë të cilët në raundin e parë nuk fituan 2/3 e votave, ndërsa në raundin e dytë kandidatët morën votat e barabarta. Duke ju referuar Nenit 68 të Statutit të UPZ-së, KQZ-ja rekomandoi që çështja të kthehet në fillim në Këshillin e Fakultetit Juridik” thuhet në reagimin e UPZ-së.
“Komisioni për Mbarëvajtje, Numërim dhe Verifikim i emëruar nga Senati ishin në përbërje, Prof. Ass. Dr. Shkelqim Millaku, kryesues; Sekretari i Përgjithshëm, Adem Sallauka, anëtar; Prof. Ass. Dr. Naim Baftiu, anëtar; Prof. Ass. Dr. Mimoza Dugolli, anëtare dhe nga radhët e studentëve, Nehat Gashi, anëtar, i cili komision ka dorëzuar raportin përfundimtar që konstaton se zgjedhjet ishim komfor rregulltat juridik që ka universiteti”.
“Menaxhmenti ka pranuar dhe shqyrtuar një shkresë publike nga studenti, Nehat Gashi, ku theksohet se zgjedhjet në Fakultetin Juridik, sipas tij, janë përcjell me parregullsi. Ky konstatim nga ana e tij, nuk qëndron, edhe për faktin se ai ishte anëtar i Komisionit dhe i ka firmosur të gjitha proceset si të rregullta”.
“Ai i referohet gabimisht, sepse Neni 18 i Rregullores së Zgjedhjeve, flet për Zgjedhjet në Këshillin e Fakultetit, e jo në Senat për zgjedhjen e dekanëve”
“Gjithashtu, pohimet e tij sa i përket zgjedhjes së Kryesuesit të Këshillit të Fakultetit Juridik, i cili do të ushtron detyrën e dekanit derisa Senati i UPZ-së të zgjedhë dekanin e këtij fakulteti, nuk qëndrojnë ngase vetë Këshilli i Fakultetit Juridik e ka zgjedhur Prof. Dr. Enver Buqajn, Kryesues”./PrizrenPress.com/