Javën që shkoi, Komisioni Parlamentar për Shëndetësi dhe Mirëqenie Sociale, debatoi për ndryshimin nenit 9, pika 2 dhe 3, të Ligjit për Kontrollin e Duhanit, duke kërkuar rikthimin i ekspozimit të duhanit në pikat e shitjes.
Por, me këtë ide të një grupi të deputetëve, nuk po pajtohen zyrtarët e Ministrisë së Shëndetësisë. Këta të fundit thonë se, “13 mijë qytetarët që kanë kërkuar ndryshimin e këtij ligji, nuk janë sa 2 milionë banorët e Kosovës”.
Vetëm dy muaj pas hyrjes në fuqi të Ligjit për Kontrollin e Duhanit, bizneset e duhanit, të përkrahura edhe nga Oda Ekonomike e Kosovës, kanë gjetur rrugë ligjore për ta rikthyer sërish në Kuvend këtë ligj, i cili, sipas tyre, duhet të ndryshohet në pikën 9, e cila e ndalon ekspozimin e prodhimeve të duhanit në pikat e shitjes.
Duke e kundërshtuar këtë ide të një grup të deputetëve, zëdhënësi i Ministrisë së Shëndetësisë, Faik Hoti, tha për Radio Kosovën, se deputetët e Kuvendit të Kosovës, para se të votojnë, duhet të mendojnë mirë për shëndetin e qytetarëve.
“Ne nuk guxojmë të paragjykojmë, mirëpo këmbëngulja e disa deputetëve që me çdo kusht kjo nismë të shtyhet para, një nismë që është në kundërshtim më interesat e shëndetit publik na bën të dyshojmë që ata kanë renë nën ndikimin e industrisë së duhanit që në asnjë mënyrë nuk duhet të ndodhte”, tha Hoti.
Njëra nga deputetët që ka votuar pro-ndryshimit të nenit 9 të Ligjit për Kontrollin e Duhanit, është edhe Time Kadrijaj nga AAK-ja. Ajo tha për Radio Kosovën se kjo është kërkesë e 13 mijë qytetarëve të Kosovës, dhe se, sipas saj, deputetët kanë obligim ndaj qytetarëve, kur ka kërkesa të tilla.
“Nuk kam dashur ta injorojë kërkesën e 13 mijë qytetarëve të Kosovës, të cilët kanë arritur ta kthejnë atë amendament në Komisionin Parlamentar por edhe në Kuvend. Unë personalisht s’kam dashur ta marr barrën dhe ta ndalojë këtë. Po është seanca plenare në të cilën do të votohet dhe ta jap mendimin Kuvendi, e jo një grup i vogël i deputetëve”, tha Kadriaj.
Në anën tjetër, zëdhënësi i Ministrisë së Shëndetësisë, Faik Hoti, duke i komentuar deklaratat e deputetes Kadriu, tha se “13 mijë qytetarët që kanë kërkuar ndryshimin e këtij ligji, nuk janë sa 2 milionë banorët e Kosovës”.
Hoti shtoi se, pas shqyrtimit të parë në Kuvendin e Kosovës të Ligjit për Kontrollin e Duhanit, do të ketë debate publike, dhe, sipas tij, Ministria e Shëndetësisë do të ofrojë fakte se ndalesa me ligj e ekspozimit të duhanit në pikat e shitjes, kontribuon në mbrojtjen e përgjithshme të shëndetit të qytetarëve./RTK/