LDK-AAK-NISMA janë bërë bashkë për të ruajtur kredibilitetin e humbësve. Zgjedhjet kanë nxjerrë PDK’në fituese përballë të gjitha partive tjera. Partisë fituese i takon Kryeparlamentari në të kundërtën vendi shkon në zgjedhje. Ne jemi të gatshëm për zgjedhje të jashtëzakonshme dhe përsëri do të fitojmë. Deputeti i PDK’së, Nait Hasani, flet për Express.
Express: Partitë opozitare janë duke negociuar marrëveshje për qeverisje përmes një koalicioni paszgjedhor. Si e shihni zgjidhjen e këtij problemi që është krijuar?
N. Hasani: KQZ ka njohur partitë fituese dhe ato që nuk kanë fituar. Kushtetuta e Republikës së Kosovës qartëson pozicionin e secilës parti, edhe juristët, edhe ata që e kanë shkruar Kushtetutën dhe për ata që e kanë miratuar Kushtetutën, është Gjykata Kushtetuese që e interpreton. Gjykata Kushtetuese e ka dhënë një interpretim se kush është parti fituese e zgjedhjeve. Nuk i njeh koalicionet paszgjedhore.
Express: Si e shihni pozicionimin e të gjitha partive politike kundër PDK’së?
N. Hasani: Nga humbjet e vazhdueshme, tash, e kanë gjetur një moment dhe janë bashkuar humbësit për të krijuar një mundësi për fitore. Gjithë udhëheqësit që kanë pësuar humbje të vazhdueshme për 15 vjet, tani, ata e shohin këtë mundësi për të ruajtur kredibilitetin e tyre. Ky kredibilitet i tyre është kredibilitet i humbësit. Prandaj, PDK në sfidën e vet që e ka, ajo është fituese. Pa marrë parasysh rezultatet dhe format që do të dalin në Parlament, PDK është fituese e zgjedhjeve.
Express: Më herët keni thënë se nuk bën të ndërtohet një koalicion mes dy partive të mëdha. Me kë duhet të bëjë koalicion PDK’ja?
N. Hasani: PDK është e hapur për të gjitha partitë që ia donë të mirën Kosovës. Kush është për të ardhmen e qytetarëve të Kosovës, PDK, është për të bërë koalicion me ta.
Express: Dikush po e sheh zgjidhjen e këtij ngërçi politik te zgjedhjet e jashtëzakonshme?
N. Hasani: PDK është e gatshme çdoherë për të shkuar në zgjedhje. Ka fituar kundër të gjithë atyre, përkundër rezultatit, përkundër pushtetit që ka pasur për tetë vjet, PDK ka fituar zgjedhjet që është sukses i jashtëzakonshëm në demokracinë parlamentare. PDK është e gatshme të shkojë në zgjedhje sa herë të do opozita dhe përsëri do t’i fitojmë zgjedhjet. Është e gatshme edhe për zgjedhje të reja për shtator.
Express: Pas këtyre rrethanave politike, sa është e mundshme që PDK të mbetet në opozitë?
N. Hasani: Nuk besoj se PDK do të mbetet pjesë e opozitës sepse i ka fituar zgjedhjet.
Express: Megjithëkëtë, partitë opozitare kanë thënë se do ta kenë edhe pozitën e Kryetarit të Kuvendit?
N. Hasani: Kushtetua e thotë qartë se partia fituese e ka të drejtën për të propozuar Kryetarin e Kuvendit . Prandaj, Kryetari i Kuvendit i takon PDK’së dhe të gjitha lojërat tjera bëhen për manipulime politike. Nëse nuk zgjidhet Kryetari i Kuvendit, atëherë, vendi shkon në zgjedhje të jashtëzakonshme. Me Kushtetutë është e përcaktuar se kjo pozitë i takon partisë fituese dhe votimi është formal. Nëse është votim formal nuk ka mundësi të propozohen kandidatë të partive tjera vetëm nëse ka marrëveshje politike, ndryshe.