Asamblistja e Lëvizjes Vetëvendosje! Drita Millaku, në gjashtëmujorin e parë të këtij viti, ka parashtruar më së shumti pyetje në Kuvend për drejtorët e Ekzekutivit të Prizrenit.
Instituti Demokratik i Kosovës(KDI),Millakun e ka vlerësuar me 16.9 për qind për parashtrimin e pyetjeve që ka bërë në Kuvendin e Prizrenit.
Sipas KDI-së, anëtarët më aktiv në parashtrimin e pyetjeve në Kuvendin e Komunës së Prizrenit kanë qenë Drita Millaku (LVV) me 16.9 për qind, Arbër Rexhaj (LVV) me 12.7 për qind Shani Berisha (BD) dhe Haziz Hodaj (LDK) me nga 8.5 për qind përkatësisht 7.0 për qind të pyetjeve të përgjithshme.
Përfaqësuesi i KDI-së në Prizren, Naim Cahanaj thotë se anëtarët e Kuvendit të Komunës së Prizrenit gjatë seancave të mbajtura në periudhën janar-qershor 2014 kanë bërë gjithsej 71 pyetje nga të cilat gjithsej 47 për qind kanë qenë të lidhura me interesin e qytetarëve të Komunës së Prizrenit, ndërsa 53 për qind e pyetjeve kanë qenë të lidhura me aspekte procedurale të punës së organeve të Komunës së Prizrenit.
“Anëtarët e LVV-së në Kuvendin e Komunës së Prizrenit prijnë me numrin e pyetjeve të bëra gjatë kësaj periudhe me gjithsej 35.2 për qind të pyetjeve, të pasuar nga anëtarët e LDK-së me 28.2 % të pyetjeve të përgjithshme”, thotë Cahanaj. /PrizrenPress.com/
