Ambasadorja e SHBA-ve, Tracey Ann Jacobson, do të jetë nikoqire e “Natës amerikane” të dytë në “DokuFest” të hënën, me 18 gusht, në ora 19:00, transmeton Indeksonline. Këtë vit, Ambasada e SHBA-ve është krenare që ka sjellë Revynë e Filmave Amerikanë (AFS – American Film Showcase) në DokuFest si pjesë e Fokusit të “DokuFest”-it: programin Amerika.
Në bashkëpunim me Universitetin e Kalifornisë Jugore, Revyja e Filmit Amerikan do të prezantojë një program të përbërë nga 15 dokumentarë amerikanë të shpërblyer, të cilët për tema kanë diversitetin dhe shoqërinë civile. Përmes Revysë së Filmit Amerikan Ambasada e SHBA-ve po ashtu sponsorizon vizitat në Kosovë të David France, i cili ishte nominuar për një Oskar për dokumentarin “Si të mbijetohet murtaja” dhe të Claire Aguilar, një kuratore filmi, montazhere dhe redaktore mediale që ka përvojë 20-vjeçare në mediumet publike.
Gjatë “DokuFest”-it France dhe Aguilar do të mbajnë një sërë punëtorish, ligjëratash, dhe intervistash.