Lideri i NISMA për Kosovën, Fatmir Limaj kohëve të fundit edhe pse ka marrë pjesë në takimet me partnerët e Koalicionit rrallë është prononcuar për media, por ai sot ka folur dhe atë u është përgjigjur deklaratave të PDK-së se ata kanë marrë besimin për formimin e institucioneve.
Limaj ua ka rikujtuar se PDK nuk ka numra në Kuvend për ta formuar as Qeverinë dhe as për zgjedhjen e kryeparlamentarit.
“Ky është një bashkim vullnetar politik i forcave tona politike, sikurse është në të drejtën e secilës parti t’i gjejë partnerët e vet. Ne jemi të vendosur në qëndrimin tonë të përbashkët për formimin e institucioneve,” ka thënë Limaj pas takimit me partnerët e koalicionit.
Gjithashtu Limaj ka shprehur vendosmërinë e Bllokut për formimin e institucioneve dhe i ka bërë thirrje PDK-së të heqë dorë nga bllokada, duke shtuar se nëse i kanë numrat, ashtu siç thonë, atëherë le ta thërrasin seancën.
“Ata që thonë i kemi numrat nuk kanë nevojë të kenë frikë. Nëse i kanë numrat atëherë le ta thërrasin seancën. Ne nuk mund t’ia sigurojmë votat askujt”, ka thënë Limaj.