Në kuadër të strategjisë nacionale për luftimin dhe parandalimin e etheve hemorragjike krime kongo (EHKK), në territorin e Komunës së Malishevës, është duke vazhduar fushata e repelimit të kafshëve, si njëra prej masave parandaluese, kundër rriqrave, pasi kafshët konsiderohen si burimi kryesor i zhvillimit të rriqrave.
Kjo formë e masave parandaluese organizohet nga Agjencia e Veterinës dhe Ushqimit e Kosovës (AVUK) dhe realizohet nga kompania “Fauna”, e cila pritet të bëjë repelimin e të gjitha kafshëve në Komunën e Malishevës, ndërsa realizimi i kësaj fushate, monitorohet nga drejtoria komunale për mbrojtje dhe shpëtim.
Deri më tani, kjo fushatë po ecën mirë dhe nuk ka probleme në realizimin e repelimit të kafshëve, ndërsa edhe banorët-fermerët, po i zbatojnë udhëzimet e drejtorisë për mbajtjen e mbyllur të kafshëve, deri sa të kryhet repelimi.
Sipas të dhënave në drejtorinë komunale për bujqësi, fondi i kafshëve shtëpiake në Komunën e Malishevës, është 16 mijë e 565, ku përfshihen 14 308 gjedhe, 8746 dele dhe 3511dhi.