Kosova ka nevojë për Qeveri dhe pa Qeveri del në sipërfaqe prospekti frikësues se kjo demokraci e re ende nuk ka mësuar se si duhet të sillet, thotë ambasadori Frank Wisner.
“Asambleja e Përgjithshme e Kombeve të Bashkuara do të tubohet së shpejti. Presidentja e Kosovës do të jetë në New York. Bota do të jetë duke menduar për Kosovën. Do të ishte për keqardhje nëse në momentin kur bota sërish merr në konsideratë vendin tuaj të mrekullueshëm, ajo do të sheh konfuzion”, thotë ai për RTV21.
“Ne dëshirojmë të shohim qartësi, dëshirojmë të shohim se pavarësia për të cilën ka luftuar aq shumë i tërë populli i Kosovës, të prodhojë një qeveri përgjegjëse dhe se demokracia po funksionon. Jo vetëm në zgjedhje, por edhe në mënyrën e formimit të qeverisë. Prandaj, me lejoni të bëj një apel të fuqishëm personal, drejtuar anëtarëve të Parlamentit: zgjidhni kryetarin tuaj, përmbushni sfidën e krijimit të shumicës dhe zgjidhni qeverinë, në mënyrë që Kosova të lëvizë përpara. Në këtë mënyrë mund të thellohen marrëdhëniet e forcuara mes Kosovës dhe Organizatës së Kombeve të Bashkuara”.