(E plotësuar)Para pak çastesh ka përfunduar takimi i kryesues së Kuvendit, Flora Brovina me përfaqësuesit e partive politike.
Përfaqësuesja e Bllokut LVAN, Vjosa Osmani ka thënë se askush nuk duhet të frikësohet nga vazhdimi i seancës konstituive.
“Në këtë takim përsërita ftesën tonë për gjithë deputetët që të marrin pjesë në vazhdimin e seancës, përfshirë këtu edhe PDK-në. Në këta minuta e para nuk pash ndonjë gatishmëri. Po i bëjmë ftesë të gjithë deputetëve ku ne synojmë që të diskutojmë përmes fjalës së lirë që të zgjidhim këtë ngërç. Askush nuk duhet të frikësohet. Nuk dua të paragjykoj nëse Flora e PDK-ja do të marrin pjesë”, ka thënë Osmani.
Brovina “bind” VLAN-in të merr pjesë në takim
Ka filluar takimi i Flora Brovinës me përfaqësues të partive politike në vend, takim ku pritet të diskutohet rreth mbajtjes së seancës së ardhshme konstituive të Kuvendit të Kosovës.
Grupi i partive politike VLAN në takim po prezantohet vetëm nga deputetja e Lidhjes Demokratike të Kosovës, Vjosa Osmani.
Përveç Adem Grabovcit nga PDK-ja, prezentë janë Aleksandar Jabllanoviq, kryetar i Listës Serbe, dhe përfaqësues të grupit 6 PLUS, transmeton Telegrafi.
Blloku shkon në takim te Brovina
Partitë e bllokut më në fund do t’i përgjigjen ftesës së Flora Brovinës. Vjosa Osmani dhe Donika Kadaj-Bujupi do ta përfaqësojnë bllokun në këtë takim.
“Blloku dërgon përfaqësuesit e vet. Vjosa Osmani dhe Donika Kadaj-Bujupi do t’i përfaqësojnë partitë e bllokut në takimin e thirrur nga Flora Brovina”, ka thënë për “Epokën e re” një zyrtar brenda partive të Bllokut.