Lideri i Nismës për Kosovën, Fatmir Limaj, ka shprehur optimizëm së shumë shpejtë do të gjendet zgjidhja për tejkalimin e ngërçit politik.
Pas takimit presidenten Atifete Jahjaga, lideri i Nismës ka deklaruar se shefja e shtetit nuk ka përmendur ndonjë afat kohor se deri kur duhet të tejkalohet kjo situatë.
“Jam i bindur se shumë shpejtë do të gjendet një zgjidhje, duke respektuar vendimin e Gjykatës Kushtetuese dhe vullnetin e shumicës parlamentare. Nuk më është thënë nga presidentja për ndonjë afat kohor për ta gjetur zgjidhjen”, ka thënë Limaj.
Ai ka kërkuar nga të gjithë që të reflektojnë për tejkalimin e kësaj gjendje në të cilën gjendet Kosova.
“Angazhimi i të gjithëve është që çdokush dhe në çdo moment të reflektojë në kuptimin pozitiv, që zgjidhja të jetë në korniza të dispozitave kushtetuese dhe shumicës parlamentare. Besoj se kështu duhet të reflektojnë të gjithë”, është shprehur Limaj.
Limaj edhe njëherë ka përsëritur qëndrimin e Nismës se vendi nuk ka nevojë të shkojë në zgjedhje.