Gjykata Themelore e Prizrenit, i ka caktuar një muaj paraburgim Shefqet Hallaqit, të dyshuarit për sulmin e së premtes në Stacionin Policor “Alfa” të Prizrenit. Ai dyshohet për katër vepra penale.
’’Gjyqtarja e procedurës paraprake-Departamenti për Krime të Rënda i Gjykatës Themelore të Prizrenit vendosi që të pandehurit Shefqet Hallaqi nga Prizreni, t’i caktohet paraburgimi prej një muaji”, njoftoi zëdhënësja e Gjykatës Afërdita Kicaj.
Sipas Kicajt, Hallaqi dyshohet se ka kryer veprat penale vrasje e rëndë e mbetur në tentativë, shkaktim i rrezikut të përgjithshëm, mbajtje në pronësi, kontroll ose posedim të paautorizuar të armëve dhe asgjësim apo dëmtim i pasurisë.
I dyshuari do të mbahet në paraburgim në kohëzgjatje prej një muaji, i cili do të llogaritet prej kohës së arrestimit më 25 tetor 2014 në orën 11:20 dhe do të zgjasë deri me datën 26 nëntor 2014.
Kërkesën për paraburgim e dërgoi në gjykatë prokurori i Krimeve të Rënda në Gjykatën Themelore të Prizrenit.
Gjykata njoftoi edhe në çfarë e bazoi pranimin e kërkesës së prokurorisë.
“I pandehuri me dashje e vë në rrezik jetën e njerëzve, me pushkën automatike-kallashnikov hyn në portën e Stacionit Policor “Alfa në Prizren, të cilën armë ia drejton polices S.Gj. e cila ishte në kabinën e kujdestarisë dhe pastaj hyn brenda në Stacion Policor duke gjuajtur në mënyrë të pakontrolluar dhe largohet nga vendi i ngjarjes”, thuhet në njoftimin e gjykatës.
Gjykata vendimin për paraburgim e arsyeton me faktin se i dyshuari ka kryer edhe më parë vepra penale.
“Duke pasur parasysh se i njëjti është recidivist, mund ta përsërisë veprën penale, apo edhe ta përfundojë veprën e mbetur në tentativë për të cilën është kanosur”, përfundon njoftimi i gjykatës.