Drejtori ekzekutiv i Spitalit Rajonal, Dr. Afrim Avdaj, të shtunën, ka pritur në takim sekretaren e Ambasadës së Japonisë në Vjenë dhe shefe e Zyrës Ndërlidhëse për Kosovë, Saori Mizuno.
Në takim është biseduar për bashkëpunimin e dyanshëm dhe përkrahjet që Qeveria e Japonisë në vazhdimësi jep për Kosovën.
”Ne si staf menaxherial, gjithë të punësuarit, por edhe gjithë qytetarët jemi mirënjohës për popullin japonez, jo vetëm për ndihmat dhe donacionet e vazhdueshme, por edhe për faktin se Japonia është ndër shtetet e para që ka njohur pavarësinë e Kosovës dhe ka prekur ndjenjat e të gjithë qytetarëve të Kosovës”,-tha drejtori Avdaj.
Ai ka falënderuar popullin japonez edhe për donacionin, dhurimin e dy auto-ambulancave, që nga sot edhe zyrtarisht janë në funksion të spitalit rajonal të Prizrenit dhe që do të shërbejnë për transportin e të sëmurëve.
Shefja e Zyrës Ndërlidhëse për Kosovë, Saori Mizuno, ka shprehur kënaqësinë që gjendet për vizitë në Kosovë, duke premtuar angazhimin dhe përkrahjen e Qeverisë së Japonisë dhe popullit japonez për Kosovën. “Ne jemi një shtet shumë i largët nga Kosova, kurse përmes përkrahjes, si ky donacion, do të ndikojmë që të afrojmë popujt tanë dhe t’i bëjmë më të afërt me njëri-tjetrin”, – theksoi Mizuno, duke shprehur kënaqësinë që autoambulancat do të jenë në shërbim të gjithë qytetarëve, jo vetëm të Prizrenit, por gjithë Kosovës/PrizrenPress.com/