Është shënuar me një sërë aktivitetesh në Maqedoni, 106- vjetori i Kongresit të Manastirit e njohur si Dita e Alfabetit.
Politikanët në Maqedoni kanë uruar gjithë popullin shqiptar, ndërkaq urime të tilla pati edhe nga skena politike kosovare. Zëvendëskryeministri i Maqedonisë, Musa Xhaferri, ka vizituar Muzeun e Alfabetit në Manastir me rastin e 22 nëntorit, Ditës së Alfabetit të Gjuhës Shqipe.
“Kongresi i Manastirit ka qenë bazamenti dhe i ka paraprijë kjo ngjarje historike pavarësisë së kombit shqiptar dhe krijimit të shtetit shqiptar”, është shprehur Xhaferri, transmeton koha.net.
Kryetari i Komunës së Gostivarit, Nevzat Bejta, ka uruar gjithë shqiptarët për Ditën e Alfabetit të Gjuhës Shqipe. “Dita e Alfabetit… është një nga ditët më të rëndësishme për kombin shqiptar kudo që është, prandaj le ta kujtojmë dhe festojmë për çdo vit e mot”, ka shkruar Bejta.
Këtë ditë e ka uruar edhe Menduh Thaçi në emër të Partisë Demokratike Shqiptare.
Por në Kosovë nuk është zhvilluar asnjë veprimtari. Megjithatë kryeministri në detyrë i Kosovës, Hashim Thaçi, ka uruar shqiptarët, duke lavdëruar punën e rilindësve të cilët, sipas tij që në atë kohë orientuan kombin tonë drejt Perëndimit duke u përcaktuar për alfabetin latin.