Mosbesimi i qytetarëve ndaj institucioneve është për shkak të grumbullimit të madh të problemeve politike dhe socio-ekonomike, thotë doktori i shkencave politike, Arben Qirezi.
Sipas tij, ngërçi pesëmujor politik dhe vendimet “kontradiktore” të Gjykatës Kushtetuese kanë bërë që qytetarët ta humbin besimin në aktin më të lartë juridik të shtetit-Kushtetutën.
Duke folur në një bisedë për Kohën Ditore, për mundësinë e shprehjes së pakënaqësisë përmes protestave, Qirezi është shprehur se për momentin kjo nuk mund të ndodhë, pasi ekziston një tolerancë ndoshta e tepërt qytetare ndaj fenomeneve negative dhe padrejtësive që po u bëhen.
“Arsyet për humbjen e besimit janë të thjeshta- në secilën votë që është dhënë kemi pasur forca të njëjta dhe liderë të njëjtë që i marrin vendimet me dyer të mbyllura dhe në mungesë të lëvizjeve politike. Ky fenomen në teori quhet kartel i elitave politike”, ka thënë Arben Qirezi. /Koha Ditore/