Procesi i pilotimit të Kurrikulës së re në arsimin parauniversitar është duke shkuar mirë.
Ky proces është duke u bërë në 92 shkolla të të gjitha niveleve në Kosovë duke përjashtuar ato të komunitetit serb. Ndërkohë, për zbatimin e plotë të saj duhet të ketë një ngritje të buxhetit, thonë zyrtarët, duke theksuar se nevojiten mjete të ndryshme nëpër shkolla.
Zyrtarë të Ministrisë së Arsimit, thonë se pilotimi i Kornizës së re të Kurrikulës në arsimin parauniversitar është duke shkuar ashtu siç është paraparë. Tashmë Korniza e Kurrikulës është duke u pilotuar në 92 shkolla, në dhjetë prej të cilave ka filluar një vit më parë. Udhëheqësi i Divizionit për plan-programe dhe tekste shkollore në Ministrinë e Arsimit, Rexhep Kastrati tha për Radio Kosovën, se procesi është në rrugë të mbarë edhe pse ka vështirësi në zbatimin e tij.
“Vështirësitë kryesisht kanë të bëjnë me sigurimin e mjeteve materiale në shkolla, vështirësi tjetër është një përkrahje më e madhe në aspektin financiar. Shkollat duhet të pajisen me mjete të domosdoshme të teknologjisë për të lehtësuar procesin e mësimit në shkolla. E domosdoshme është që për arsim duhet të rritet buxheti, duhet më tutje ngritja e kapaciteteve, duke u nisur nga drejtoritë komunale të arsimit, drejtorëve e mësimdhënësve.”
Kastrati theksoi se një çështje tjetër që do të ndihmonte në zbatimin e kurrikulës, është edhe formimi i grupeve punuese në nivelin komunal.
“Këtë proces duhet ta bartin komunat, ku duhet të përfshihen mësimdhënësit më të mirë, të cilët duhet të bëjnë trajnimin e mësimdhënësve dhe mentorimin e tyre, njëkohësisht të ndihmojnë edhe në vlerësimin. Për këtë jemi në bisedime me komuna.”
Koordinatori i Shkollës së Mesme Teknike “28 Nëntori” në Prishtinë, Zijadin Ibrahimi, tha se në këtë shkollë është viti i dytë që bëhet pilotimi i Kurrikulës dhe sipas tij nuk ka pasur probleme.
“Pilotimi ka filluar vitin e kaluar. Sivjet është viti i dytë. Të gjithë arsimtarët janë të kyçur në hartimin e planprogrameve, shqyrtimin e kornizës kurrikulare dhe kornizës bërthamë. Nga shkolla jonë janë 3 kryetrajnerë, janë 6 trajnerë të kyçur në procesin e trajnimit të mësimdhënësve dhe të gjithë punojnë. Jemi model, sepse jemi një nga dy shkollat profesionale në nivel të Kosovës, që jemi në vitin e dytë.”
Ndërkohë, Ministria e Arsimit ka filluar përgatitjet për hartimin e kurrikulës për fëmijërinë e hershme, që përfshinë moshat nga 0 deri në 5 vjeç dhe pritet të fillojë pilotimin nga viti i ardhshëm. Kurrikula e re përmban reformimin e planeve dhe programeve, procesin e mësimdhënies, tekstet shkollore, vlerësimin e nxënësve si dhe kualifikimin e mësimdhënësve./rtk/