Zëdhënësi i Aleancës për Ardhmërinë e Kosovës (AAK), Ernest Luma, ka thënë për Telegrafin se deri më tani nuk ka ndryshim të marrëveshjes së arritur në mes partive të koalicionit LDK-AAK-NISMA. Reagimi i Lumës vjen pas deklaratës së deputetit të LDK-së, Arben Gashi, i cili ka thënë se marrëveshja e Bllokut duhet të ridizajnohet.
Sipas Lumës, marrëveshja, në të cilën parashihet që i pari i AAK-së, Ramush Haradinaj të jetë kryeministër i Kosovës, nuk ka lëvizur nga binarët e saj.
“Unë mund të them që qëndrimi zyrtar është ky dhe se marrëveshja në mes partive të LAN-it do të vazhdojë të respektohet derisa të arrihen qëllimet të cilat parashihen në marrëveshje,drejtimi i qeverisë nga koalicioni LVAN”, ka thënë Luma për Telegrafin.
Ndryshe, deputeti i Lidhjes Demokratike të Kosovës, Arben Gashi ka vlerësuar sot se marrëveshja LDK-AAK-NISMA duhet të ridizajnohet për shkak të rrethanave të reja politike.
Sipas tij, në këtë rrethanë, kryeparlamentari duhet të jetë i pranueshëm për të gjithë, të cilin mund ta nominojë PDK-ja, kurse kryeministër duhet të jetë Isa Mustafa e zëvendëskryeministra Albin Kurti e Ramush Haradinaj.