Aleanca për Ardhmërinë e Kosovës përmes një komunikate për media po e quan dënimin e djeshëm të Policëve të Kosovës me gjithsej nëntë (9) vjet burgim, skandaloz dhe dënim politik.
Këta zyrtarë policorë sipas AAK-së, janë dënuar politikisht për shkak se kanë zbatuar ligjin, duke reaguar në detyrën zyrtare të tyre ndaj njerëzve të armatosur (truprojat) e Vulinit, në vitin 2013.
“Por, për shkak se kanë zbatuar ligjin ndaj këtyre serbëve të armatosur, policët janë dënuar rëndë. Kjo është dorëzim i shtetit të Kosovës ndaj Serbisë dhe ndëshkim politik ndaj policëve. Qeveria e Kosovës, e ndikuar direkt prej agjendës politike të Serbisë, duhet të reflektojë në të këqijat që po i bëjnë për çdo ditë e më tepër. Edhe për Asociacionin, edhe për Demarkacionin, edhe për dhunën që po përdorin, por edhe për ndëshkimin politik që i kanë bërë dje policëve”, thuhet në komunikatën e AAK-së.
Sipas AAK-së, thjesht, Qeveria e Kosovës i la në baltë dhe poshtëroi policët, duke mos u ofruar asnjë lloj mbrojtjeje!.