Në zgjedhjet lokale të vitit 2013 kanë fituar mandatin e tyre të parë si anëtarë të Kuvendit të Komunës. Që të dy e përfaqësojnë të njëjtin subjekt, Partinë Demokratike të Kosovës. Madje kanë emër dhe mbiemër të njëjtë: Alush Shala.
Këshilltari Alush Shala në Kuvendin e Prizrenit është pjesë e pozitës. Ndërsa emnaku i tij është opozitar në Kuvendin e Komunës së Suharekës, shkruan sot “Koha Ditore”. Një dallim tjetër që kanë është mosha, ku politikani nga Prizreni është 58 vjeç, ndërsa ai i Suharekës 41 vjeç.
Fakti që janë këshilltarë aktivë ka bërë që identitetet e tyre nga të tjerët të ngatërrohen, me ç’rast ndonjëherë kanë lindur situata qesharake, apo edhe ndonjë mosmarrëveshje. Por këshilltari i KK të Prizrenit, Alush Shala, dhe këshilltari i KK të Suharekës, Alush Shala, kanë vendosur që ndodhitë e tilla t’i kapërcejnë me humor..
