Kryetari i Partisë Demokratike të Kosovës (PDK), Hashim Thaçi, nuk duhet të pret që kryetari i dënuar i Prizrenit, Ramadan Muja, të jap dorëheqje, por këtë gjë duhet t’ia rekomandojë atij menjëherë.
Kështu vlerësojnë analistët politik dhe shoqëria civile, të cilët, konsiderojnë se kryeministri Thaçi nuk duhet të rrijë duarkryq ndaj bllokadës që mund t’i bëhet Komunës së Prizrenit nëse Muja do të vazhdojë të ankohet për vendimin që ka marrë, nga një nivel gjyqësori në nivelin tjetër.
Analisti politik, Avni Zogiani thotë se do të ishte mirë që kryeministri i Kosovës të ndjek rrugën e presidentit amerikan, Barack Obama, i cili pak kohë pasi patë shpërthyer afera e bashkëpartiakut të tij, Rod Blagojevich, i patë kërkuar Blagojevichit që të tërhiqet.
“Ne të gjithë po e dimë se çfarë ka ndodhur, është konfirmuar prej një niveli të gjykatës çfarë ka ndodhur. Tani, krejt barrën edhe të gjitha shigjetat duhet të drejtohen tek kryetari i PDK-së Hashim Thaçi, sikurse në rastin e Blagojevichit që u drejtuan Obamës në Çikago nën dyshimin se ai ka shitur vendet e senatorëve. Në momentin që ka dalë skandali i tij, askush se ka pyetur askënd tjetër, përveç se Obamën, edhe natyrisht që Obama patë thënë se duhet të tërhiqet menjëherë”, thotë ai,shkruan Gazeta Blic.
Edhe Driton Selmanaj nga Instituti Demokratik i Kosovës, thotë se nuk duhet të pritet që gjykatat tjera të merren me rastin e Mujës, por është Muja ai që duhet të reflektojë. Për këtë çështje duhet të deklarohet edhe Partia Demokratike e Kosovës.
“Me qëllim që të bartet mesazhi tek qytetarët për rëndësinë e respektimit të legjislacionit vendor, dorëheqja e menjëhershme e Ramadan Mujes do të ishte një veprim shumë i rëndësishëm politik dhe qytetar. Vlerësoj se ka ardhur koha kur njerëzit që mbajnë poste publike të largohen nga pozitat udhëheqëse derisa ti pastrojnë duart me ligjin”, thotë ai.
Selmanaj thekson se Muja ka të drejtë ligjore të rri si kryetar komune derisa një gjykatë tjetër, ku do të ankohet Muja, mos ta nxjerrë një vendim tjetër, por, sipas tij, është e pamoralshme që kryetari i Prizrenit të mbajë postin publik edhe pasi është dënuar nga një gjykatë.
“Parimisht sipas legjislacionit në fuqi, z. Muja nuk i ndalohet vazhdimi i mbajtjes së postit, por moralisht ai nuk ka të drejtë që tash tutje të jetë në krye të komunës së Prizrenit”, thotë ai.
Ramadan Muja, është dënuar dje (e enjte) për keqpërdorim të detyrës zyrtare, ngase, kishte shpërdoruar prona, përkatësisht, kishte ndërruar pronarin e një prone publike, e cila ishte nën administrimin e Agjencisë Kosovare të Privatizimit, të njëjtën e kishte bartur në pronësi të Komunës dhe më pas ia kishte dhuruar një kompanie për prodhimin e çokollatave.
Me t’u marrë vendimi për dënimin e tij, Lëvizja Vetëvendosje në Prizren dhe Bashkimi Demokratik kanë kërkuar nga Muja që të jap dorëheqje.