Gjatë mbledhjes së sotme të Këshillit Komunal për Siguri në Bashkësi, komandanti i Stacionit Policor “ Alfa” , Haris Dida, ka kërkuar nga komuna e Prizrenit, që të jetë më e përgjegjshme gjatë realizimit të projekteve në rregullimin e infrastrukturës rrugor dhe asaj nëntokësore.
Dida, tha se policia nuk po njoftohet nga organet përkatëse komunale dhe kompanitë për afatin e realizimit të projekteve.
“Po na shkaktohen telashe të mëdha në qarkullimin normal të automjeteve siç është rasti në rrugën ndërmjet hipermarketeve “ Emona” dhe ETC, si dhe rreth tek Ura e Marashit “, tregoi ai.
“Një ndër shqetësimet më të mëdha që kemi si polici gjatë angazhimeve tona për të ofruar siguri për qytetarët, është mungesa e ndriçimit publik në shumë rrugë dhe lagje të Prizrenit, dhe nëse i’a shtojmë kësaj edhe mungesën e kamerave të sigurisë, atëherë po kemi edhe më shumë telashe rreth kësaj çështje”.
Ndërkaq, kryetari i Prizrenit, Ramadan Muja, tha se për çështjen e realizimit të projekteve infrastrukturore do të kërkojë zgjidhjen e këtij problemi të ngritur nga policia.
“Ndërsa, sa i përket ndriçimit publik, mirëmbajtja buxhetit të Komunës i kushton 50 mijë euro në muaj, dhe nuk mund të gjejmë pozicione tjera buxhetore për të funksionuar si duhet ndriçimi publik në tërë qytetin dhe fshatrat e komunës sonë”./TV Prizreni/