Jakup Hotit nga Krusha e Madhe e Rahovecit i kanë ngordhur gjashtë krerë lopë, nga 47 sa i ka gjithsej në fermën e tij, si pasojë e shfaqjes së sëmundjes antraks, raporton KTV.
Pas ngordhjes së tyre menjëherë ka intervenuar Agjencia e Veterinarisë dhe Ushqimit, e cila ka marrë masat e nevojshme për mbrojtjen e lopëve të tjera.
Pavarësisht intervenimit, nga sëmundja antraks janë prekur edhe disa nga pjesëtarët e familjes Hoti, mirëpo gjendja e tyre është jashtë rrezikut për jetë si rezultat i ndërhyrjes së menjëhershme të mjekëve.
Agjencia e Veterinarisë dhe Ushqimit, me të marrë mostrën për shfaqjen e sëmundjes së antraksit, ka urdhëruar vaksinimin e menjëhershëm të të gjitha kafshëve në Krushë të Madhe.
AVUK-u iu ka konstatuar familjarëve që në afat prej 10 deri 14 ditë nuk kanë të drejtë të konsumojnë mishin e as qumështin nga krerët e lopëve, si rezultat i vaksinimit të tyre. /KTV/Koha.net/