Pritet që ditën e sotme, ish-guvernatori Ardian Fullani të dalë para Gjykatës së Apelit për t’u përballur me caktimin e masës së sigurisë, raportojnë mediat shqiptare.
Për ditën e sotme, janë shpallur disa seanca që do të zhvillohen në 15 shtator, ku mes tyre është edhe seanca që do zhvillohet për ish-guvernatorin Ardian Fullani. Ditën e sotme, ish-guvernatori do dalë para Gjykatës së Apelit, për t’u njohur me vlerësimin e arrestit dhe me masën e sigurisë. Në orën 12:00 seanca ndaj Fullanit, do merret në shqyrtim nga trupi gjykues me relator gjyqtarin Alaudin Malaj dhe anëtarët Shkëlqim Miri dhe Agim Bendo. Në këtë seancë do zhvillohet një përballje mes trupit gjykues dhe avokatëve mbrojtës.
Ish-guvernatori Fullani u shkarkua të enjten nga ana e Komisionit të Ekonomisë, ndërsa në seancën e radhës parlamentare të 18 shtatorit shkarkimi i tij pritet të jetë në rendin e ditës dhe të aprovohet edhe në Kuvend.
Po sot pritet të dalë para gjykatës edhe ish-inspektorja Elivar Golemi, mbi të cilën rëndon gjithashtu akuza për shpërdorim detyre.