Kandidatit të Partisë së Fortë nuk i pëlqen që qytetarët të brengosen me problemet e qytetit.
“ Duhet të ekzistojë ndarja e pushtetit me qytetarët. Ata janë të brengosur mjaft me problemet e tyre, andaj edhe s’kanë pse të marrin pjesë në vendimmarrje ”, ka thënë Visar Arifaj mbrëmë në emisonin Rubikon të KTV-së.
Si problem kryesor të kryeqytetit Arifaj e ka parë numrin e lartë të drejtorive, që sipas tij ato duhet të reduktohen nga 11 në vetëm 3 të tilla.
Sa i përket mungesës së ujit në kryeqytet, Partia e Fortë nuk e sheh si problem dhe aspak të nevojshëm, sepse ky është një problem që thjeshtë nuk e preokupon partinë.
Një tjetër shqetësim i madh i kryetarit legjendar është edhe problemi i trafikut urban. Si problem kryesor ai e sheh pamundësinë e qytetarëve për të bërë gjiro në vendet ku ka kafiteri, dhe që Partia e Fortë ka synim ndërtimin e korseve të veçanta pikërisht në këto rrugë.
E veçanta e Partisë së Fortë është se ata kanë menduar për trafikun edhe në periudhën e dasmave. “Dasmat janë pjesë thelbësore dhe tradicionale e popullit tonë, andaj ne do të ndërtojmë edhe semaforë specialë, që drita e gjelbër të jetë gjithnjë e ndezur për automjete”, premtoi Arifaj.
E ndërtimet pa leje janë ato që ia japin karakteristikën e veçantë qytetit të Prishtinës, dhe se kur partia e tij do të marrë në menaxhim kryeqytetin do të ndërtohen mbindërtime të shumta. Ky është premtimi që pa hezituar e dha para auditorit televiziv Visar Arifaj i Partisë së Fort.
Kryetari legjendar shprehu edhe preferencat e tij nga kultura dhe arti, ku libri i tij i preferuar mbetet “Nga sfida në sfidë “ e Behgjet Pacollit, ndërsa filmi “ Nëntori i dytë”.