Kandidati për kryeministër nga Lidhja Demokratike e Kosovës (LDK), Avdullah Hoti, ka thënë se Kosova duhet të ketë një kuvend funksional, dhe jo që ka probleme e pengohet nga gazi lotsjellës.
“Nuk mundemi me mbetë vrimë e zezë në Ballkan. Brukseli nuk është ai në të cilin duhet të ankohemi. Por, janë politikanët e Kosovës ata që duhet të ndërrohen”, ka thënë Hoti.
Ai i ka bërë komentet gjatë një takimi me banorë të fshatin Gjonaj të Hasit, në vazhdim të fushatës për zgjedhjet e 11 qershorit.
Hoti ka thënë se është me fat që i prin listës së një partie e cila ekziston e vepron qe 27 vjet.
Në bashkëbisedime me banorët, Hoti ka shprehur besimin se Hasi do të mbetet “bastion” i LDK-së.
“Hasi do të na mbështes në rrugëtimin tonë, njëjtë sikurse Rugovën, sepse tashmë LDK-ja është bashkë dhe tash e dy vite kemi kryer shume punë”.
“Ne kemi përgatitur një program, ku zënë vend nga fëmijët e deri tek pleqtë”, ka theksuar Hoti.
Sipas tij, programi i LDK-së ofron zhvillim ekonomik, mirëqenie e luftë kundër korrupsionit, integrim në BE dhe NATO, ashtu siç e ka thënë vazhdimisht presidenti historik, Ibrahim Rugova.
Hoti është zotuar se LDK-ja do të qeverisë me “duar të pastra”./ekonomiaonline/
