Policia Rajonale e Prizrenit njofton se të shtunën në mbrëmje, rreth orës 17:25 minuta të datës 12 mars, në vendkalimin kufitar në Vërmicë, gjatë kontrollit të dokumentacionit është ndaluar një shtetas i Republikës së Shqipërisë ngase rezultonte të jetë i kërkuar më urdhër arrest ndërkombëtar për llogari të drejtësisë së Belgjikës.
Pas arrestimit, është informuar Ambasada e Shqipërisë dhe prokurori i shtetit në Prizren për procedura të më tejme.
Ndërkaq, të nesërmen, rreth orës 08:30 minuta, në vendin e njëjtë është arrestuar edhe babai i të arrestuarit të mëparshëm ngase edhe ky rezulton të jetë i kërkuar nga drejtësia belge.
Dy të arrestuarit po mbahen nën masën e ndalimit me urdhër të prokurorit të shtetit ndërsa procedurat po i kryejnë hetuesit rajonal të Prizrenit në bashkëpunim me Zyrën Ndërlidhëse ILEC në Prishtinë. /PrizrenPress.com/