“Ballkoni”, pos që është përzgjedhur zyrtarisht të jetë pjesë e festivalit “Onetakefilmfestival”, në Zagreb, i njëjti film edhe do të hapë festivalin. Ky festival është i vetmi i këtij lloji, pasi është specializuar vetëm për filmat e xhiruar në një plan sekuencë. Lendita Zeqiraj ka thënë për KultPlus, se pjesëmarrja në këtë festival është nder i veçantë për të dhe për kinematografinë e Kosovës
“Ballkoni”, i Lendita Zeqirajt në pjesën e dytë të nëntorit, do të ketë një prezantim më të veçantë se sa herëve të tjera. Filmi kosovar i metrazhit të shkurtë që dallohet për xhirimin e filmit në një plan sekuencë-pa montazhë do të jetë pjesë e Festivalit të vetëm në Botë, që i dedikohet pikërisht realizimit të filmave të tillë. “Onetakefilmfestival”, që mbahet në Zagreb të Kroacisë prej 16 deri më 18 nëntor, pos që ka zgjedhur filmin “Ballkoni”, të jetë pjesë e këtij festivali të rëndësishëm, organizatori, pikërisht filmin “Ballkoni”, e ka vendosur në hapje të festivalit, dhe, sipas regjisores Zeqiraj, një vendim i tillë i ka bërë nder asaj dhe kinematografisë së Kosovës.
“Ky festival është shumë i rëndësishëm, sepse është një perlë e rrallë, pasi që është i specializuar për filma të teknikës, me të cilën është i punuar “Ballkoni”. Filmit iu dha një hapësirë nderi dhe do të jetë filmi i cili do ta hap festivalin, një nder i veçantë jo vetëm për mua si autore, por edhe për produksionin n’Art, e për të gjithë aktorët e ekipin, si dhe për gjithë kinematografinë e Kosovës”, ka thënë për KultPlus, Zeqiraj.
Ajo shprehet të jetë e gëzuar me përzgjedhjen zyrtare të filmit “Ballkoni”, në këtë festival, dhe, sipas saj, me vetë këtë pjesëmarrje, gara merr një dimension tjetër. “Është festivali i vetëm i këtij lloji në botë, dhe për mua, gara merr një dimension tjetër, sepse, tani është përzgjedhur për të garuar në një kategori edhe më të specializuar”, ka përfunduar Zeqiraj./KultPlus.com