Fitorja e Tony Bellew në duelin e tij me David Haye, ka bërë që shumë njerëz publikisht të flasin se si Haye duhet të tërhiqet.
Në fakt 37 vjeçari, gjashtë vitet e fundit ka boksuar shumë pak dhe është dashur ti nënshtrohet operacioneve për ti trajtuar lëndimet e krahut dhe të tetivës së Akilit.
Këto lëndime dhe koha e pa mjaftueshme e kaluar në ring me kundërshtarë të fortë kohëve të fundit u vërejtën mbrëmë kur Haye, u rrëzua në rundin e tretë, kurse pas rrëzimit në të pestin, nuk ishte më në gjendje të vazhdonte.
Përderisa shtypi për Hayein parasheh tërheqjen Bellew tashmë është në kulmin e karrierës së tij në boks dhe asnjëherë nuk ka pasur gjasa më të mira të luftojë për titull.
Mirëpo, titujt aktualisht i mbajnë Anthony Joshua (WBA, IBF dhe WBO) dhe Deontay Wilder (WBC). Mediat mbrëmë kanë spekuluar edhe rreth duelit të këtyre dy boksierëve që ka kohë që po negociohet.
“Lufta do të ndodhë, dhe potencialisht 95 për qind do të ndodhë në këtë vit”, ka thënë Joshua për Sky Sport Box.
“Janë vetëm disa detaje për t’u zgjidhur. Unë jam gati dhe shumë i interesuar për këtë ndeshje. Unë kam punuar shumë për këtë dhe dua që ai të vjen në Britani ose edhe unë të shkoj në Amerikë”, shtoi britaniku.
Në anën tjetër, i pyetur për gjasat që të luftojë me Joshuan, Bellew ka dhënë një përgjigje shumë interesante dhe aspak tipike “Dua të luftoj me Tyson Furyn. Mendoj se mund ta nokautoj atë. Andre Ward më duket po ashtu interesant. Dueli me Joshuan? Nuk do të ndodh kurrë. Ai është i gjatë dhe ka shumë energji e shpejtësi. Nuk më duhet një problem i tillë”, deklaroi Bellew.