Të nominuarit për kandidatë për të parin e komunës tashmë po i sfidojnë subjektet politike brendapërbrenda. Kështu, deri më tani në këtë drejtim Dega e LDK-së, siç duket, është më e sulmuara.
Baxhaku para Selmanajt
Kryetari i LDK-së në Prizren, Haxhi Avdyli, thotë se kandidatura e Hatim Baxhakut për kryetar të Prizrenit është propozuar dhe diskutuar para se Driton Selmanaj të anëtarësohet në LDK. Sipas tij, Baxhaku e ka mbështetjen e Kryesisë dhe të 90 për qind të nëndegëve të LDK-së në Prizren. “Kur e kemi diskutuar emrin e Hatim Baxhakut, Driton Selmanaj nuk ka qenë pjesë e LDK-së. Tash ekziston një pajtim i gjerë që Baxhaku të jetë kandidat për kryetar të Prizrenit”, thotë Avdyli. Mirëpo, një burim i gazetës, që nuk deshi të bëhet publik , tregon se Dritonin anëtarë të Kryesisë e kanë ftuar duke e quajtur një lloj Shpend Ahmeti për Prizrenin. “Tash, besoj se duhet ta mbajmë atë premtim që anëtarë të Kryesisë i kanë bërë”, na tha burimi. Kurse, kryetari Avdyli thotë se Kryesia e Degës së LDK-së ka kandiduar Baxhakun për kryetar të Prizrenit. Ndërkaq, vetë Baxhaku ka sqaruar të shtunën se nuk ka të tilla mospajtime, dhe se në mënyrë unanime ka marrë përkrahjen për të qenë në garën për Prizrenin. “Jo. Nuk ka këso mospajtime. Unë nga Kryesia e Degës në Prizren në mënyrë unanime nga të gjithë anëtarët prezentë kam marrë përkrahjen. Po ashtu edhe nga 90 për qind e nëndegëve. Normalisht kandidatura shkon në Kryesi dhe Këshillin e Përgjithshëm nga ku pres përgjigje pozitive”, u shpreh Baxhaku
PDK-ja ka 3-4 emra në listën e ngushtë
Ditë më parë kryetari i Degës, Minir Krasniqi, dhe ndoshta njeriu i dytë pas Veselit që ka ndikim në këtë vendim, për të bërë nominimin e të parit për kryetar të Komunës së Prizrenit nga kjo parti, ka thënë se janë katër emra, por ai nuk përmendi asnjërin prej tyre. Tash dihet se ky subjekt ka disa emra, si: Hasan Hasanin, Afrim Avdajn, Nahit Hasanin dhe Alush Shalën. Por, siç duket, këta janë emra të Kryesisë së kësaj Dege, edhe pse emrat të përfolur janë: Shaqir Totaj,Veton Firzi dhe Afrim Tejeci. Tani të gjitha këto mbetet se si do të perceptohen dhe ku do të jetë pika për të zgjedhur të nominuarin për kryetar të Komunës së Prizrenit. Krasniqi për “Kosova Sot” ka thënë se emra nuk do të veçojë, por e di se edhe këtë mandat kenë synim të fitojnë PDK, edhe se ka bindjen që falë organizmit të dalin fitues edhe në këtë mandat.
Të tjerët thanë se po punojnë
Në këtë kontest tashmë, sipas të gjitha gjasave, LVV-ja ka shpallur një lloj konkursi, ku të gjithë anë- tarët mund të konkurrojnë, por burime tona bëjnë me dije se aty janë dy kandidatë, ndoshta që mund t’i plotësojnë kriteret. Pra, mund të jetë Mytaher Haskuka ose edhe mund të shkohet me Azem Ramadanin. Ky i fundit i posaardhur nga PDK-ja në këtë subjekt politik. Por, po ky burim na bën me dije se Artan Abrashi nuk ka synime të jetë kandidat, edhe pse ai gëzon një reputacion pozitiv brenda kësaj partie.
Nga ana tjetër, AAK-ja tashmë ka kandidatin kaherë të nominuar Lulzim Kabashi, kurse Nisma do të nominojë Zafir Berishën. Mirëpo, takimet e fundit dhe mundësia e këtyre dy subjekteve politike të bashkohen në një subjekt për zgjedhje lokale, domosdo se nga këta dy emra mund të dekorohen që njëri të jetë i nominuari, ndërsa kandidat të tretë s’mund të pritet që të ketë brenda këtyre partive. Pastaj, ai dakordim varet se a bëhet shpejt e pa keqkuptime, kjo mbetet të shihet.
“Tash, vetë Nisma dhe AAK-ja i kanë shpeshtuar takimet me anë- tarësinë dhe janë të vetëdijshëm se Prizreni është “beteja e madhe”, siç quhet ndryshe në politikë, ngase Prizreni është një lloj tabele paraprijëse për politikën kosovare dhe tek pastaj vijnë qytetet e tjera, bile edhe vetë Prishtina”, thotë Bashkim Gashi nga shoqëria civile.
(Kosova Sot)