Artisti shqiptar Helidon Xhixha ka fituar çmimin e publikut në Bienalen e Dizajnit në Londër, për instalacionin e tij.
“Fitoren ia kushtoj Shqipërisë dhe shqiptarëve. Në mënyrë të veçantë atyre që si unë kanë njohur emigracionin”. Kështu shprehet për Top Channel menjëherë pas fitores në Biennalen e Dizajnit të Londrës, artisti i njohur Helidon Xhixha, më i preferuari i publikut në këtë edicion ku ai u paraqit me veprën “Bliss”, të vendosur në Somerset House Courtyard në qendër të kryeqytetit britanik.
Skulptura e tij monumentale prej çeliku mbart pikërisht idenë e një qyteti të përkryer, ku njerëzit mund të arrijnë një bashkëjetesë të lumtur. Vizionin e tij artisti shqiptar e ka materializuar në këtë vepër që arrin të realizojë ndërveprim mes vizitorëve, të lirë të ulen e të shohin vetveten apo ata që kanë afër, të pasqyruar në çelik.
Në zemër të instalacionit, mes kolonave, ndodhet jo rastësisht edhe një hartë e Europës, Eldorado për mijëra emigrantë. Veprat monumentale të Helidon Xhixhës, i lindur në Durrës dhe i formuar në Akademinë Brera të Milanos, tanimë zënë vend në koleksionet, muzetë dhe sheshet më të rëndësishme në vende të ndryshme të botës, nga Majemi në Zvicër, nga Rusia në Emiratet e Bashkuara.
Në Bienalen e vitit të kaluar në Venecia instalacioni madhështor, një ajsberg çeliku që lundroi në Kanal Grande jo vetëm që mahniti publikun e kritikën, por përcolli edhe një mesazh të fortë mbi mbrojtjen e mjedisit. /TCH