Këto ditë të ftohta, por edhe para këtyre temperaturave të ulëta, Prizreni ka qenë i atakuar nga gripi sezonal. Gripi sezonal zakonisht karakterizohet nga temperatura e lartë, kolla e thatë, dhembje koke e muskujsh, dobësim e rrjedhje të hundëve. Shpeshherë personat e prekur nga gripi kanë ethe dhe kanë telashe në rast se nuk marrin mjekimin e nevojshëm me kohë. Koha e inkubacionit të virusit të gripit të zakonshëm është dy ditë. Gripi i zakonshëm mund të prekë të gjithë popullatën, por ajo mund të sjellë komplikacione për një pjesë të popullatës si fëmijët, të moshuarit dhe pacientët kronikë apo me gjendje të vështirësuar shëndetë- sore. “Ata që preken më shumë nga gripi janë personat me probleme të zemrës, mushkri, veshka, pacientët me sëmundje gjaku, me probleme metabolike si diabeti ose ata me sistem imunitar të dobët”, thotë dr. Kujtim Bakiqi, shef i Emergjencës në Prizren.
Kërkojnë ndihmë mjekësore pas rrëshqitjeve në akull
Sipas Organizatës Botërore të Shëndetësisë, janë tre tipa të gripit të zakonshëm. Tipi i gripit A ka disa nëntipa të tjera dhe kombinime të viruseve. Disa nga nëntipat janë A(H1N1), A(H3N2), të cilat po qarkullojnë edhe te njerëzit në të gjithë botën. “Tipi C i gripit është më pak i zakonshëm se A dhe B. Për këtë arsye në vaksinën e gripit sezonal përfshihet mbrojtja për tipin A dhe B”, thotë Bakiqi.
Ai pohon se vetëm në natën e 31 dhjetorit në Shërbimin Emergjentë janë paraqitur numër i madh pacientë kryesisht fëmijë me simptomat e gripit. Ai pohon se numri i të takuarve nga gripi mund të shkojë deri në 200 pacientë brenda dite.”Kohët e fundit rënia e temperaturave e ka ulur pak numrin e pacientëve me inflamacione gripoze, por e ka shtuar numrin e atyre që kanë pasur nevoja emergjente për shkak të rrëshqitjeve në borë e në akull”, thotë Bakiqi, shkruan gazeta Kosova Sot
Shtohet numri i mjekëve për t’iu përgjigjur emergjencave
Mehmedali Gashi, drejtor i Qendrës Kryesore të Mjekësisë Familjare në Prizren, pohon se viti 2016 ishte viti më mirë sa i përket furnizimit me barna nga lista esenciale. Sipas tij, furnizimi ka qenë diku në masën 60 për qind të nevojave të përgjithshme.
“Ne nuk jemi prapë të kënaqur, sepse ideale do të ishte të ketë furnizim 100 për qind, por, duke u bazuar në fondin e Ministrisë, këto janë mundësitë. Këtë vit s’kemi kërkuar barna tjera, por reshjet e fundit na kanë detyruar që Emergjenca të shtojë 100 për qind kujdestaritë. Kemi pasur numër të konsideruar intervenimesh. Këtë fillim viti ende nuk kam shumë informacione për furnizim me barna”, thotë Gashi, duke shtuar se e ka shtuar numrin e mjekëve në Emergjencë për t’iu përgjigjur situatave të ndryshme të emergjencave gjatë këtyre ditëve me ngrica. Ai shpjegon se Prizreni ka 44 objekte të shëndetit primar, një objekt të Emergjencës, pastaj ka 26 ambulanca dhe 15 qendra mjekësore familjare.
“Kjo ka bërë që Prizreni të jetë njëra ndër komunat që më së shumti ka treguar përkushtim sa i përket ndërtimit të ambulancave, pastaj Qendrave Shëndetësore dhe bashkë me të edhe Qendrave Familjare. Falë angazhimit të Drejtorisë së Shëndetësisë dhe Drejtorisë së QKMF-së është arritur që me mjete vetjake të bëjë shumë në këtë drejtim”, thotë Gashi, drejtor i QKMF-së në Prizren.
Duhet që barnat t’i blejnë vetë
Edhe zyrtarët e Spitalit Rajonal në Prizren njoftojnë se në tanimë ka numër të shtuar pacientësh nga gripi, sidomos në Repartin e Pediatrisë. Zëdhënësi Shefajet Berisha është shprehur numri i pacientëve nuk mund të thuhet se është alarmant, megjithatë vazhdon të mbetet i madh. Ai është shprehur se nuk janë të rralla as rastet e thyerjeve nga rrëshqitjet në akull. Ai shprehet se rastet e tilla zakonisht trajtohen në Emergjencën e qytetit. Duke pasur parasysh këtë gjendje, autoritetet në Prizren kanë apeluar që mos të dilet pa nevojë jashtë, derisa të kalojë moti i acartë. Nga ana tjetër, qytetarët ankohen për mungesën e barnave. E reja Agnesa Gashi shprehet se gjatë trajtimit të babait të saj nuk ka pasur asnjë bar dhe të gjitha i është dashur t’i blejë vetë familja. Lidhur me këtë rast, drejtori Mehmedali Gashi pohon se kjo mund të ndodhë vetëm nëse bëhet fjalë për barëra që janë jashtë listës esenciale.
(Kosova Sot)