Organet komunale të Prizrenit ende nuk e kanë zbatuar vendimin e Kuvendit për shpërndarjen e dekoratës-çmimit “Remzi Ademaj” për 75 dëshmorët e luftës së UÇK-së.
Ky vendim ishte miratuar nga KK-ja në korrik të këtij viti me synimin që dekoratat për dëshmorët e Komunës së Prizrenit të shpërndahen më 15 gusht, kur shënohet përvjetori i rënies së heroit, Remzi Ademaj, dhe më 15 shtator në Ditën e dëshmorëve të Komunës së Prizrenit, shkruan sot “Koha Ditore”.
Zyrtarë të lartë të pushtetit lokal në mbledhjen e fundit të organit më të lartë vendimmarrës komunal kanë konfirmuar se dekoratat nuk janë shpërndarë me arsyetimin se në kohën e sipërpërmendur është zhvilluar fushata paraelektorale për zgjedhjet e parakohshme nacionale. Sipas tyre, dekoratat janë gati dhe pritet të gjendet koha e përshtatshme për shpërndarjen e tyre tek familjarët e dëshmorëve.
Në seancën e fundit të KK-së së Prizrenit këshilltari nga radhët e Nismës Socialdemokrate, Shukri Quni, ka kërkuar llogari nga zyrtarët përgjegjës për mosshpërndarjen e dekoratave.
Kryesuesi i KK-së së Prizrenit, Artan Abrashi, në këtë mbledhje ka vlerësuar se pyetja e kuvendarit Quni është me vend dhe ka shpjeguar se ekziston vetëm një arsye për mosshpërndarjen e dekoratave, që, sipas tij, ka qenë periudha e fushatës paraelektorale për zgjedhjet nacionale.