Policia e Kosovës ka shqiptuar 67 gjoba disa personave në qytetin e Prizrenit, Suharekës dhe Dragashit, gjatë vikendit që e lamë pas për shkak të mosrespektimit të masave kundër Covid-19.
Sipas Policisë së Kosovës, inspektorët komunalë dhe inspektorët sanitarë nga AUV, gjatë kryerjes së aktiviteteve të tyre përveç shqiptimit të gjobave kishin dhënë edhe 15 vërejtje.
“Më datat 18-20 shkurt, duke u bazuar në vendimet e Qeverisë së Republikës së Kosovës (masat mbrojtëse kundër virusit Anti-Covid 19), Drejtoria Rajonale e Policisë në Prizren, inspektorët komunalë dhe inspektorët sanitarë nga AVU-it, kanë zhvilluar aktivitete në parandalimin dhe respektimin e masave kundër Covid-19. Gjatë kryerjes së detyrës zyrtare, angazhimet policore në zbatim të masave anti-Covid, janë kryer në stacionet policore në Prizren, Prizren-Veri, Suharekë, Dragash dhe NJRKRR ne Prizren. Në zbatim të këtyre masave janë shqiptuar 67 gjoba personave fizikë, janë dhënë 15 vërejtje”, ka bërë me dije Policia e Kosovës.
E në kuadër të inspektimeve sipas policisë janë kontrolluar edhe 89 biznese të ndryshme ku katër prej tyre u janë shqiptuar gjoba prej 200 eurosh për shkak se nuk e kishin respektuar orarin e punës.