Paralajmërimi i opozitës së gjatë sesionit vjeshtor nuk do ta votojnë asnjë ligj në Kuvend, ka shqetësuar partinë në pushtet.
Deputeti i VV-ja, Arbër Rexhaj, ka kërkuar nga partitë opozitare që të votojnë për miratimin e marrëveshjeve ndërkombëtare.
Ai ka thënë se nga këto marrëveshje Kosova përfiton miliona euro.
“Deklarimet e tyre zyrtare tregojnë që ata (opozita) nuk do të jenë pjesë e votimeve. Mirëpo ajo çka më brengos më së shumti janë votimet ndërkombëtare, kur Kosova do të përftonte mjete nga Ligjet të cilat duhet të votohen dhe sigurisht se kërkesa ime ndaj tyre do të ishte kjo sepse është në të mirë të qytetarëve, pra çdo ligj është në të mirë të qytetarëve, mirëpo këto marrëveshjet ndërkombëtare duhet të votohen pavarësisht pozitë apo opozitë”, ka thënë Rexhaj për EO.
Ai ka vlerësuar se VV-ja në shumicën e rasteve kur ka qenë në opozitë i ka votuar marrëveshjet ndërkombëtare.
“Mendoj që ligjet vitale të cilat kanë pasur shumë rëndësi, ne i kemi votuar, pra unë kam shikuar lista dhe kam parë që në shumësi të rasteve ne kemi votuar pro, mirëpo ka pasur raste kur ne nuk jemi pajtuar, pra ose nuk kemi marrë pjesë ose ka qenë vota kundër. Ka shumë. Ndër to është Projektligji për arsimin që duhet të kalojë sa më parë. Ne kemi disa Projektligje të cilat janë në komisionin tonë për Siguri, e të cilat duhet të kalojnë, ka Projektligje sidomos ndërkombëtare e që Kosova do të përfitonte shumë në aspektin ekonomik”, është shprehur ai.
Reklamë
