Pas një tenderi të dështuar në fund të vitit 2012, në qershorin e vitit 2013 Ministria e Kulturës kishte hapur një tjetër tender për restaurimin e shtëpisë së Katarina Josipit në Zym të Hasit, e tek në gusht një konsorcium kishte marrë përsipër punimet. Këtë muaj tenderi është anuluar, shkruan Koha Ditore.
Përkundër faktit se projekti për restaurimin e konservimin e shtëpisë së doajenës së teatrit ka qëndruar në sirtarin e Ministrisë së Kulturës që nga viti 2012, institucioni më i lartë i kulturës në vend ka dështuar që ta finalizojë këtë projekt. Tenderi i parë kishte dështuar për shkak të numrit të pamjaftueshëm të ofertuesve, ndërsa i dyti është anuluar.
“Gjykata” e tenderëve është jofunksionale qysh prej 1 gushtit të vitit të kaluar.Mungesa e kuorumit në Organin Shqyrtues të Prokurimit ka bërë që ky autoritet të mos mund t’i shqyrtojë mbi 200 lëndë që nga ajo kohë. Përpos tenderit për restaurimin e shtëpisë së Katarinës, si pasojë e mosfunksionimit të OSHP-së është anuluar edhe tenderi për renovimin e objektit të Teatrit Kombëtar të Kosovës./KD/