Kur regjisori Fatbardh Smaja nisi të punonte për të vënë në skenën e teatrit të Shkodrës dramën e Martin Camajt, nuk mund ta mendonte se koha e tij me veprën do të ishte aq e shkurtër. Me pasionin e një regjisori që do veprën e tij, ai punoi për ta sjellë Camajn, shkrimtarin që për vite me radhë ishte gati i ndaluar në qytetin e lindjes, me gjithë dimensionin e tij si shkrimtar. Kjo, pasi “Kadili i Argjandit” për Smajën nuk ishte thjesht një dramë, por dhe një mënyrë për të njohur më mirë Camajn.
Pas suksesit që pati në skenën e teatrit “Migjeni” në Shkodër, vepra do të ngjitet më 5-6 dhjetor në skenën e teatrit eksperimental “Kujtim Spahivogli”. Dhe pse regjisori nuk është më, duke u ndarë nga jeta vetëm pak javë më parë, vepra vjen si një homazh jo vetëm për Camajn, por edhe për të. Në dramë interpretojnë aktorët Rita Gjeka; Jozef Shiroka; Merita Smaja; Agron Dizdari; Eliona Shkreli; Enver Hyseni; Nikolin Ferketa dhe Simon Shkreli. Drama u shkrua rreth viteve ’50, por tingëllon e afërt në kohë edhe pas kaq dekadash. Pikërisht aktualitetin që përcjell kjo dramë për kohën e sotme, ishte dhe një nga arsyet që Smaja donte ta vinte në skenë. Kjo pasi teatrin ai e shihte dhe si një formë ndërgjegjësuese për shoqërinë. Regjisori Smaja u nda nga jeta më 7 nëntor 2015 në Shkodër, gjatë kohës që punonte për vënien në skenë të kësaj vepre.
“Kandili i argjandit” është një dramë social-politike që mund të vetëkuptohet arsyeja pse i ka munguar lexuesit dhe spektatorit gjatë periudhës së diktatorit. Regjisori Smaja pati mprehtësinë e duhur që, pikërisht në këtë situatë aspak shpresëdhënëse për spektatorin, të sjellë dritën e Kandilit të Argjandit në kohën më të volitshme të tij. Kandili, dritëprurësi i një jete të dalë nga errësira e kohës së territ e tmerrit, na jep tablonë e frustrimit psikologjik, që kanë kaluar mijëra familje shqiptare në periudhën e parë të vendosjes së regjimit komunist. Regjisori Smaja i ka futur kësaj vepre të gjithë elementet që e bëjnë grishëse dhe aktuale për publikun.