Paulina Bukowskas nga Polonia i janë dashur shumë argumente për t’i bindur prindërit dhe miqtë e saj se Kosova më nuk është një vend i rrezikshëm dhe se këtu gjendja është normale.
Ka kaluar një javë prejse ajo ka ardhur në Prizren dhe është angazhuar si praktikante në festivalin e filmit dokumentar dhe të shkurtër “DokuFest”, duke u përkujdesur për imazhin e kësaj ngjarjeje në mediat sociale.
“Për fat të keq, kur e përmend Kosovën në Poloni njerëzit e perceptojnë si diçka të rrezikshme dhe se mund të të ndodhë diçka e keqe. Prindërit e mi ishin të shqetësuar në fillim, por tani janë në rregull, ngase lajmërohem çdo ditë”, ka thënë Bukowska për Kohën Ditore.
Ajo ka bërë të ditur se “DokuFesti” ka qenë arsyeja kryesore që e ka nxitur të përballet me kundërshtitë në rrethin e saj dhe të vijë për disa javë në Kosovë.
“Kam punuar në festivalin e filmit në Krakow dhe aty kam dëgjuar për ‘DokuFestin’. Festivali në Prizren ka një ndikim të madh dhe tani edhe vetë jam bindur se shumë mysafirë ndërkombëtarë vijnë këtu vetëm për këtë arsye, ndërkohë që njihen për së afërmi edhe me kulturën dhe shtetin e Kosovës në përgjithësi”, ka deklaruar Bukowska