Filmi i fundit dokumentar i BIRN “Të Paidentifikuarit”, i cili heton komandantët përgjegjës për disa prej sulmeve më brutale të luftës së Kosovës, do të shfaqet në edicionin e këtij viti të festivalit të filmit “DokuFest” në Prizren.
Filmi dokumentar i BIRN “Të paidentifikuarit”, i cili përmend emrat e zyrtarëve serbë që të urdhëruan sulmet në fshatrat e Kosovës përreth qytetit të Pejës në vitin 1999 dhe ata që janë përfshirë në operacionin e fshehjes së trupave të viktimave, do të shfaqet për herë të parë në ambient të hapur të mërkurën dhe të enjten e kësaj jave në “DokuFest” në qytetin e Prizrenit.
Shfaqja e filmit dokumentar në “DokuFest” ka një domethënie të veçantë për ne, pasi filmi trajton ngjarjet që kanë ndodhur 16 vjet më parë vetëm pak kilometra larg nga Prizreni dhe publiku i Kosovës do të jetë i pari që do ta shohë atë,” tha Marija Ristic, regjisore e dokumentarit .