Drejtori i Drejtorisë së Arsimit në Rahovec, Behar Rama, siç duket është dorëzuar pas ankesave të shumta të profesorëve të larguar padrejtësisht nga puna në shkollat e mesme të komunës së Rahovecit, sipas publikimit në faqen zyrtare të Komunës së Rahovecit, sot është rishpallë konkursi në katër shkollat e mesme, në të cilat është vërtetuar se ka pasur shkelje serioze.
Pas shkeljeve të shumta, drejtori Behar Rama, kishte refuzuar rekomandimet e Inspektoratit Regjional të Arsimit në Gjakovë për anulimin dhe rivlerësimin e disa pozitave të shpallura në konkurs, me arsyetimin se profesorët e larguar nuk kanë arsim adekuat.
Rama kishte thënë se konkursi nuk do të anulohet sepse kjo nuk është kërkuar nga Inspektorati i cili ka dërguar vetëm rekomandime, siç kishte thënë Rama, Inspektorati ka dërguar një kërkesë për të rishqyrtuar dhe rivlerësuar kandidatët e pranuar, por se konkursi s’ka arsye që të anulohet.
Përveç kësaj, këshilli i profesorëve të diskriminuar, javë më parë kishte ngritur kallëzim penal ndaj Behar Rames në Prokurorinë Themelore të Gjakovës, por siç ka mësuar RahovecPress, Behar Rama është intervistuar dy ditë radhazi në prokurori për rastin e profesorëve.
Ndryshe, edhe zyra e Avokatit të Popullit ka qëndruar dje në Rahovec, ku është takuar me drejtorin Rama dhe disa nga profesorët e larguar.
RahovecPress ka siguruar dokumentin e konkursit të rishpallur, të datës 3 tetor 2014, me firmën e drejtorit Behar Rama./RahovecPress/